Oi genti ,mamma mi fici hjuriri
Mi fici sangu di li soi vini
Latti di notti mi ‘ndi ‘ndunau
Chja stessa mamma chi mi parturiu.
Oi genti mamma, mi dezzi parola
Fu’ dija maistra di la mia scola
Subba lu pettu mi scrissi lu nomi
E ‘nta lu cori lu soi randi amuri.
Oi mamma,mamma mia bella
Oi mamma, mamma mia duci
Oi genti mamma mi dezzi culuri
Mu mi li tingiu li mei occhj chjari
Mi dezzi acqua chi frisca scurria
A la hjumara di sta mamma mia.
Oi genti mamma mi dezzi li mani
Mu mi lu stringiu tuttu lu beni
Pemmu u mi vestu na pezza di linu
Mi dezzi a strata pemmu u caminu.
Oi genti mamma mi dezzi l’amuri
Mu dezzi randi chju’ di lu mari
Ammenzu la notti chi tuttu scurìa
S’appiccia na stella pe’ sta mamma mia.
Oi mamma mamma, chi mi dunasti
Chija notti chi mi parturisti?
Ti dezzi hjatu chi chju’ non potia
Pe’ tia io dezzi la vita mia.
Oi genti mamma mi dezzi la vita
E di mia mancu fu’ bona servuta
Ca chija notti chi mi parturiu
La mia cara mamma: chjusi l’occhj e moriu!
Oi mamma mamma sentimi ancora
Parra lu cori di sta figghjola
Chista canzuni la cantu pe’ tia
Ca si pe’sempri la mamma mia.
Chista canzuni la cantu pe’ tia
Ca si pe’sempri la VITA mia.
Oi mamma,mamma mia bella
Oi mamma, mamma mia duci…
Giusy Staropoli Calafati