Oltre l'infinito........

Picciriju, picciriju venisti

‘nta la pagghja ti posasti

cu la Vergini Santa Maria

e Giuseppi chi ti joculia.

‘Nta li mundi lu gloria sonau

quandu l’angioleju a li pasturi annunciau

“Ha nesciutu lu redentori

figghju dilettu, nostro Signuri.

Ha nesciutu ‘nta lu friddu amaru

u voi e u somaru lu caddiaru,

ciangia chija notti lu picciriju Signuri

ciangia pe’ dari lu soi grandi amuri.

Li panni mancavanu a chiju criaturi

a nuda ‘nta lu friddu, nostru Signuri,

pe’ dari a l’omini l’amuri eternu

di lu principi primu, d’ogni regnu.

La Madonneja u ‘ccuppava 'nta lu santu vilu

ma, finu li saggi arrivau lu duci gridu

pe’ la grutta si partiru di l’orienti

e la stella li portau ja’ o Re viventi.

Cantati pasturi a lu duci bambinu,

cantati l’amuri a lu figghju divinu,

a li genti portati la bona novella

ca lu bambineju e’ nesciutu sutta chija stella.

L’omini tutti, su d’allegrizza signati

li cieli festusi, su luminati

luci lu mari, s’allesti la terra

m’accogghj la luci chi mandau la stella.

Giusy Staropoli