Oi genti, tutti quanti, stacitimi a sentiri , mò dicu chiju chi ‘ncunu non vozzi mai diciri, ca io chjù non mi spagnu di re, né di burbuni, ca sugnu brigantessa e nuju m’e’ patruni.
Non vogghju chju’ mu sentu lamenti strati strati, non vogghju mu si cianginu li figghj e mancu i patri, non vogghju mu si dici ca nui meridionali simu na malarrazza chi s’avi di scacciari.
Patrini nostri, furu tutti li briganti, ma certu non vol diri ca simu malamenti, pecchì ‘ndi difendimmu quand’e’ chi comu bratti, volenu u ‘ndi scacciannu ca i cunti eranu fatti.
Allura vui veniti, cca’ ‘mmenzu e fati rota, ca io vogghju mu parru di tempi di na vota, vogghju ca u piemontisi chi sbertu ‘ndi scacciau, mu sapi ca di briganti non si ‘ndi libarau.
Nta l’occhj avimu sangu e dintra o pettu u cori, ballamu nta lu ventu comu all’unda di lu
mari, e senza ‘mpedimenti mu si pò parrari, briganti tutti quanti ‘ndi continuanu a chjamari.
Allura o maistà stacitimi a sentiri, ca cuntu a vuci ata, chiju chi vi vogghju diri:
“…na vota nc’era cui ‘nc’era, gatta corda e na lumera; nc’era na terra cu na bandera chi u suli e a luna la guvernava.
Era l’Italia di li tanti genti: piemuntisi, burbuni e puru briganti.
‘Nc’era na terra cu tanti atri ancora, chi mò si a viditi non pari com’era; subba lu pettu ‘nci hjurenu hjuri e subba la vucca giardini d’amuri.
Avìa salotti pé gran signuri, palazzi di la scola e tavuli i baruni, ‘nc’eranu puru leggi di regnu e tribunali, genti di ‘rrazza, fimmani e omani d’onuri.
Era n’Italia spartuta a dui anti: chija du Piemunti e chija du briganti.
‘Nc’era nu regnu di l’atri spartutu, chi mu dassanu sulu ‘nci parìa peccatu; era u meridiuni cu munti e cu hjumari chi all’art’Italia volìanu attaccari.
Nu jornu all’intrasatta e all’ammucciuni mandatu du Piemunti e nò burbuni, vinni tuttu armatu un cumbattenti, mu pigghja possessu, mu talìa sti genti.
Allarmi, allarmi, allarmi, venìa Peppi Garibaldi, cumandanti i spedizioni, venìa cuntra o re burbuni.
Senza scrusci e mancu trona, u regnu di Sicilii perdiu a curuna, u meridiuni cangiau la storia e L’Italia signau a prima vittoria.
Spartuta a dui anti s’apria a n’anta sula mentri morenu briganti e burbuna.
Eranu milli e jeranu tanti, apposta i mei moriru tutti quanti.
E moni chi atru non pozzu chjù fari, cu carta e calamaru mi vogghju libarari. O re, cu forza vogghju mu ‘nci scrivu comu ‘nta sta terra, brigantissa vivu.
“Sua maistà eccellenti, chi curuna vi dezzaru tutti li genti, vi cercu pe’ mia n’urtima udienza, mu lejiti chiju chi scrivu pe vostra eccellenza.
A chiji tempi volìa u ‘nc’eru io, ca sugnu brigantissa e sugnu i Dio; volìa di bon cori mu potìa presenziari alla spedizioni di l’eroi nazionali, chi vinni all’intrasatta e all’ammucciuni e di garzuni vi fici patruni.
Volìa mu ‘nc’eru e di tutta chija genti, nommu restavanu mancu i lamenti. A na jestima mu venenu ‘mpenduti, mu si mangiavanu comu cani affamati e futtuti. Ca la mia genti chi volìa verità, moriu pa jestima di la libertà.
Oh vostra maistà, che nto nord vi ‘ndi stati, pecchì no cu hjuri ma cu armi minati?
Chistu era un regnu chi di genti era preju, nc’eranu Madonni e Bambineju.
‘Ccà s’ammucciava u briganti terruni, ‘cca’nta stu pezzu di meridiuni.
Chista era a terra che mentri penzava, ‘nta mari affucava e a galla tornava, pecchì lor signuri assassini e cumandati, venìanu ammazzati di briganti.
‘Ccà sutta, u brigantaggiu non era un terruri, ma na difesa e giardini du hjuri, adduvi la genti du meridioni, criscìa intelligenzi i l’Italia minori.
Ma vui o bella genti, vui o piemontisi, chi vi dunastivu pe ‘mbrogghj e francisi, ‘nci pigghjastivu onuri e dignità a sta genti, chi pe morti e massacri fu chiamata briganti.
E’ cu orgogliu allura, chi io moni scrivu, du meridiuni chi mi campa e chi vivu; scrivu da genti chi vali e chi cunta, di soni soi battenti e da taranta; scrivu di un sud chi doppu i Garibaldi, perdiu cristiani, storia e tanti sordi.
Scrivu i nu ritrmu, chi si queta, ‘mpaccisci, di nu tamburellu chi chjù forti poi agisci; scrivu da muzzicata di la taranta, di la tammurriata chi balla forti e poi canta.
Vi scrivu, o maistà, di nu ritrmu potenti, chi pizzica tutta la mia bella genti, vi scrivu i nu sud chi non si poti scordari e si senti ancora chju’ meridionali.
E mo’ chi l’Italia si fici una, a terra mia non voli chjù vastuna, voli mu vaci ntò celu chjù atu, a musica nostra nommu eni peccatu, pecchì mai si fermanu a sonu li dita o ritmu ndiavulatu da nostra vita.
Battinu subba a chitarri e subba a tamburi, battinu pugna forti e ritrmi chjù duri. Battinu forti pè l’indipendenza arrobbata, a nomi di burbuni e di la tammurriata.
Eccellenti maistà, mo u sud si rivota, non voli mu paga i cunti i na vota, pecchì chista unioni chjù assai fami portau, e sulu pinnacchj st’Italia dunau.
Ma nui simu genti chi non s’arrendi, apposta pé sempri chiamarannu briganti; a Milanu e Torinu chjamarannu terruni: chiju sud chi mancandu fà cadiri l’unioni.
…chista è la terra du meridioni!
La terra chi o prezzu da libertà, dezzi a l’Italia la soi unità.
O vostra maistà, sulu chistu haju i diri, la nostra storia non po’ certu finiri, né si po’ scordari lu meridioni: di burbuni, briganti, storia e tradizioni.
… e siccomu l’Italia ‘ndi jungiu alla corti, mò simu italiani ‘nzinna alla morti.
“(…) 1861 pe’ meritu o pe curpa i ‘ncarchi d’unu, l’Italia dichiara la soi unità e du sud sarà chiju chi sarà”…
Viva L’Italia e la soi unità….
Giusy Staropoli Calafati
Una risposta a LITTARA O ‘RE (prima classifcata premio letterario dialetto e lingue minoritarie di Calabria- terza classificata premio letterario Caccuri)