14-01-12
Giusy Staropoli Calafati si classifica al terso posto al premio regionale di poesia dialettale in provincia di Vibo Valentia.
Con la lirica Paroli Calabrisi, la giuria, presieduta da personaggi legati al mondo culturale e letterario, ha premiato la poetessa Briaticese per il secondo anno consecutivo confermando un terzo posto sul podio della poesia in vernacolo calabrese…
PAROLI CALABRISI
Paroli si ‘ndi dinnu tanti assai,
paroli calabrisi cu non d’ha dittu mai?
Cu a gugghja e u filu avogghja u si ‘ndi cusi,
parinchinu li buca e li partusi.
Su scritti cu la pinna e scritti a manu,
scangiati ‘ntornu a rota e allu tilaru.
‘Nte’ libbra di maistri sugnu misi
comu satizzi a canna sugnu ‘mpisi.
Paroli chi a parrari sugnu assai,
chju’ si ‘ndi dici chju’ non fìninu mai.
E si a rima, na chitarra i ‘mpendi e cordi,
si dassanu i cuntari puru i sordi.
Paroli calabrisi e chi cuntati,
stramenti chi dija sona e vui cantati?
‘Ndavi duci e puru amari assai
chi a vucca araggia e non si queta mai.
‘Ndavi chi d’amuri su acconzati
comu cu maistria sardi salati.
‘Ndavi chi du scornu arrussicannu
ca parri e non lu sai si fannu dannu.
Ca ditti sugnu senza sentimentu,
paroli su’ arraggiati di turmentu.
Eppuru, su’ paroli di na vota
chi i dici lu figghjolu e a maritata.
Li dici a schietta, u previti e u baruni
ca sugnu paroli chi ‘nd’avi a miliuni.
‘Nd’avi pe’ li poveri e puru pe’ li ricchi
pe’ li sventurati e ‘nd’avi puru pe’ l’affritti.
‘Nd’avi chi alli voti cadinu da cruci,
chi poi tornanu ‘mpisi e fannu luci.
Si dinnu cu nu sonu e n’atru ancora,
secundu i ‘dduvi veni la parola.
Po’ esseri i muntagna o di marina,
ditta a denti stritti o a vucca chjna.
Paroli calabrisi su’ fjuri d’ogni misi,
paroli su’ di vantu e d’amuri a stu’ paisi.
E vui chi pe’ lu scornu chju’ non di diciti
scordativi i sta terra e chju’ non ‘ndi parrati.
Scordativi di ‘dduvi nesciru sti paroli
i ‘dduvi la mammina vi fici parturiri.
E si vrigogna vi veni mu u parrati,
u calabrisi, vi pregu, non lu mantugati.
Ma nommu avissi u aviti nostalgia,
“ah, la parrata di la casa mia!”
Ca mancu chju’ lanzola nci su ‘mpisi
pemmu u ‘ndi scriviti paroli calabrisi.
Io calabrisi su’ e d’accussi’ parru
senza mu mi pigghju tantau d’arru.
E quandu vogghju u cuntu i stu paisi,
lu fazzu cu paroli calabrisi.
Cu chista vucca in calabrisi cantu
E di sta terra io ‘ndi fazzu vantu.
Paroli allu capizzu ‘nd’haju ‘mpisi
e sugnu tutti paroli calabrisi.
Giusy Staropoli Calafati