Tantu tempu, tempu d’arredi
‘nc’era na lumera e nu vrasceri.
A lu paisi arrivaru previti di luntanu
U benidicinu stu mundu e mu ‘ndi dannu a manu.
Vinnaru pe’ parrari a tutta la genti
Di Cristu Sgnuri e i deci cumandamenti.
Mu studiànu stu popolu d’emigranti
E mu cumbertinu a la cruci tutti quanti.
Tra diji, nu previti artu-italianu
Chi u calabrisi avivi u mu parri chjanu chjanu,
Ca quandu parravi non capiscia mancu na cerza
Eppure di la scola avia fattu chju’da terza.
Era un professori di grandi ragionamenti
Chi cercava pemmu u scava ‘nta storia di li genti,
accussi ‘ncuminciau nu randi lavuru
e di libra no smovia mancu lu scuru.
Quantu lejuti, e pagini scritti
Di chjiu chi antichi dicenu e di chjiu chi diju puru vitti,
jendu ‘nta li casi di saggi piu’ vecchj
mu scrivi ca pinna e mu senti chi ricchj.
E fici di la storia nu randi tesoru
Scrissi di Briaticu vecchju e di lu molu.
Parrau di la turri e di ditteri antichi
E culurau a paroli i vinej e li vichi.
OH, chi cristianu chi ‘ndi manduau lu patri eternu
Senza mai u si queta ne’ ‘nta stati e ne’ ‘nto ‘mbernu.
Mu cunta di tempi passati fatti e vicendi
U scuppa vecchj statui e mi svila di tendi.
E mo’ chi la storia tutta l’ha cernuta
Vinni l’ura di la ricogghjuta.
Vinni u jornu di lu gran salutu
A lu previti nostru chi Cristu ha Servutu.
E comu facimu senza un Cristo e storia?
Lu tempu fuji vola e non da’ gloria,
pecchi’ mo’ chi arrivau l’ura di cunti
Briatico perdiu almenu milli punti.
Restau senza storia a n’atra vota
Ma a vita lu sapimu e’ a randi rota,
gira ca ti gira , gira e vota
non c’e’ nenti da fari, gira a rota.
Ma a rota randi chi gira e chi vaci
U sapi ca i stu salutu urtimu ‘ndi dispiaci
E sulu mo’ daveru stamu capiscendu
Lu valuri randi chi jamu perdendu.
Pecchi’ puru ca non ci stezzimu tantu vicnu
A Patri Maffeo assai beni ‘nci volimu
Passaru tanti anni e chju’ assai jorna
Di Natali , processioni e chiamati di Madonna,
Subba a l’artari sempri prontu e subba all’attenti
Mu predica la gloria di Cristu ‘nta storia di genti.
Pero’ na carpu armenu ‘ndi l’avimu i pigghjari,
ca troppu sulu lu vozzimu dassari,
mentri di nui cercava u scuverta a storia vera
mu vidi na vota Briaticu com’era.
Pe’ chistu, moni, simu chjumputi finna ‘mpundu
Pecchi’ sta leggerezza non da perduna u mundu
E nui chi mundu simu ai pedi du Signuri
Pe’ tia previti nostru pregamu a tutti l’uri.
Ti ringraziamu di chju chi facisti
Di nomi nostri chi ‘nte’ libra scrivisti
Di la storia nostra chi ‘ndi cuntasti
E di tutti li cosi belli chi ‘ndi dicisti.
Pe’ nui si’ briaticotu e accussi’ mu resti
Puru quandu luntanu si ‘nta atri stanzi e vesti
Pecchi li megghju anni pe’ nui li cunzumasti
E di stu popolu calabrisi a storia cuntasti.
Allura cu cori in manu e tantu amuri, mo’ ti salutamu
E ‘nta’ nu randi abbrazzu forti ti stringimu.
A tutti quanti simu, puru tu, stringindi a manu
Ca non smettimu mai u ti ringraziamu.
G. Staropoli Calafati